قراءه في كتاب - المسحوق والأرض الصلبه

حين .. تلقي نظره خاطفه على غلاف هذا الكتاب ربما مع تداخل الخطوط لا تلاحظ الجمله المبعثره أعلاه والتي مفادها " كلامنا لفظ مفيد كاستقم " وربما أيضا لا تستوعب معنى وجودها والتي لا أنكر أنني لم أكن أعرفها ولكن بمجرد أن تبدأ في تصفح الكتاب تدرك مغزى وجودها .
ويظهر ظهر الغلاف هوية هذا الكتاب الذي صرح بكل وضوح أنه موجه للجمهور وأنه من دونه لا شيء مما يدعو أي قاريء لمواصلة قراءة الكتاب طالما أنه مهم لهذه الدرجه وهو ذكاء من الكاتب .
يكسوني بعض الدهشه لأن هذا الكتاب تقريباً أول كتاب أقرأه ويكون مصنف على أنه " نصوص" والتي احترت قليلاً في المقصد منها ولكنها قد تكون مناسبه لمضمون الكتاب المتنوع وقد شرح الكاتب مقصده في النص الأول
الكتاب يأخذنا إلى أكثر من منطقه أحب الكاتب التطرق لها فنحن ببساطه أمام كاتب يعشق الكتابه بشتى أنواعها سواء جاءت شعر او قصه .. الخ
لا يهم المهم أنها في النهايه كتابه تعبر عنه وعن واقعه
جاءت بعض النصوص متماسه مع واقع يعيشه شباب كثر مثل نص : حياه الكترونيه .. الذي تعرض لإشكالية تجاهل الواقع الملموس
والاندماج في عالم آخر يكون بطله جهاز الكمبيوتر فقط وقد طرح تساؤلات عديده نسألها جميعاً
ربما بعضها ظل بلا إجابه حيث جاء طرحه دون قصد إجابه بعينها ولكن للإستفهام فحسب
أرى أن القصائد جاءت " كمالة عدد " في الكتاب حيث أجدها ضعيفة المستوي بالمقارنه مع بقية النصوص
تأتي نصوص " المسحوق والأرض والصلبه " في المقدمه حيث تعرض لإشكاليات الكتابه والقاريء وجودة النصوص وغيرها وكلها إشكاليات نحن في حاجه لمناقشتها ورغم أنه كتب على فترات متباعده إلا أن كل نص منهم يحمل في جعبته إشكاليات هامه أعتقد أن الكاتب عالجها بشكل جيد
الكتاب يمتاز بأسلوبه الساخر ولابد أنك ستستفيد أيها القاريء العزيز من ذلك المسحوق " الكاتب " فلم لا تجرب ؟

شـــــــــــــــــــــــــــ النفوس ـــــــــــــــــــجـر

شجر النفوس

تحت الشجر مترصصه حبة نفوس

هربانه من ظلم الحياه

لكن الحياه مش قابله تخسر معركتها مع الشجر

وكله متآمر معاها

حتى كمان ضل الشجر

مين سواها؟

خلّى قوت الغلبانين يبقى وحش

سم كوبرا

يقتل ف لحظه وميفاوضش.

...

...حبة نفوس مترصصه محتاجه أطواق للنجاه

لكن ..

مفيش حد اعترف

ليه هوه قاعد تحتها؟

هل ينتظر من ينقذه ؟

أم أنها تتويهه عن سر الحياه ؟؟

أم إنه ساهي عن كل فكره

صادقه تخلق معجزه ؟!

الأربعاء

2 م

17/6/2009

خاطره

يا لوحة العمر الشفيف
تكشّــفي
كي أغفـــو بحضــنك
لن أبيع العمر يوماً
فاسمحي لي أن أكون اليوم
نجمة هذه الدنيا

أحلام أولاد المترو " الشوارع سابقاً " ساندوتش فول

ركبت عربة المترو سيدات واضعه المنديل على أنفي "لم أشتر كمامه بعد "ووجدته يهمس

طفل مترو عنده حوالي 9 سنين :

عاوز ربع جنيه

أنا : ليه

الطفل : جعان

أنا : وهوه الربع جنيه بردو هيأكلك

الولد : ذهول وتتنيحه غريبه

أنا : أنا هجيبلك أكل لكن فلوس لأ

الولد : ماشي

....

على حظنا النحس المترو إتعطل المهم فضلت ماسكه ايده عشان يطمئن " كانت مبهدله ومتوسخه "

المهم المترو جه وطلع أصلا نازل نفس المحطه بتاعتي اللى هي " المعادي"

خدته وقلتله : تحب تاكل ايه بقى

قالي :فول

أنا : حاله من الإستغراب والإندهاش عجيبه

قلتله ده انت غلبان اوي

بس انا هجيبلك حاجه أحلى ..

مش هقول طبعاً هي إيه

...

كل ده مش مهم عادي

الوجع الإنساني اللي بجد لما تعرفوا انه المدرسه رفدته وضربوه عشان رمى أقلام أصحابه من الشباك

وامه متوفيه وابوه عايش وهوه بينزل كده يسرح مع نفسه

لا وطلع ساكن قريب مني كمان

انا كل مشكلتي دلوقت اني اقابله تاني واحاول اساعده بجد

انا خلاص استويت من كتر ما بشوف لازم نعمل حاجه

ولا إيه رأيكم

على فكره اسمه عز الدين

انا مش شايفه أي عزه ممكن نفتخر بيها طالما فيه مليون عز الدين ملقوش حد يساعدهم

:::::::::::::::::::::::::::::::::::::::::::::::::::

الحمدلله ان النت رجع عشان اقدر اكتب المشكله دي

تحياتي للأصدقاء جميعاً