Tuesday, December 18, 2007

محــ،،ــلاك يــ،،ــا بلدنـــ،،ــــا

محلاك يا بلدنا
إتبدّلت الأحوال
وإتغير الموّال
والدنيا صبحت حلوه
ومصر صبحت خاليه من أي إشكال
..................
شوارع نضيفه وبتبرق
وناس عمرانيين أخلاق
ونبع صافي في عيونهم
وما بينهم هيام وأشواق
....................
وعلى ضفتك يا نيل بمشي وبتمايل
وبشوفك نضيف وضفافك .. فيها عسل سايل
كل ّاللّي أقوله قليل .. لو قلت فيك مواويل
هيقولوا فيك الشعر .. والكلّ فيك قايل
.......................
ولا عاد فيه حراميّه .. ولا قتله ولا ظالمين
ولا بتحوي يا بلدنا ..غير حقيقي بني آدمين
.....................
لو في يوم هتعوز خدمه .. متموتش من الصدمه
ديه بتتعمل في الحال
ولو في يوم هتعيّا .. والله راح تحيّا
مش من دوا يتصرف .. ده من صلاح الحال
...........................
ولو لقيت إبنك .. فشل في تعليمه
متشلش يوم الهمّ .. دي الدوله هتقّدّره
وللمجد هتوصله وعلى المجد يا والده
والله هتحصّله
………………
ولو حتى كان إبنك .. لدراسته مش عايز
ويقولك أكون فنان .. وللشهره أكون حايز
هتقوله طب جايز ..متلقاش وظيفه في يوم
سيبه يجربها .. مش راح يبات محروم
.....................
بلده مليااااااااااانه وظايف
قوله ميبقاش خايف
ومش هيجي في يوم
للمسؤلين ويلوم
.....................
وإن كنت متغرّب .. قرّب هنا وجرّب
هتلاقي عيشه هنيّه .. ولقمه حلوه طريّه
وأوعاك من الصدمه .. تنهبل وتستغرب
.....................
وأمّا تعوز تتفسح .. من غير ما تتكلّم
تروح لأقرب فرع لأي جمعيه .. وأصولها حكوميه
! وتصريحاتها رسميه
مهي إتقفلت الجمعيات .. النصّابه الحراميّه
هيدّوك فلوس بالكوم .. مش عشره ولا ميّه
.......................
وتروح وتتفسّح .. وتفرّح العيله
ومتخفش من الإفلاس .. متخفش ما هتحتاس
!هتحتاج .. هتلقى جيوش .. تديك ومتردوش
وهتحس من غيرهم .. إنك ما تسواش
..................
وإن جيت في يوم ملّيت .. م الفسحه والخروجااااات
والزحمممممه واللمممممّه
إنزل وتحت البيت .. خد من الورود شمّه
وفي كل حته هتلاقي.. شجره وجنينة ورد
وهتخاف تدوس على الأرض ..دي بالفل مفروشه
وهتحس إنك مت .. وطلعت للجنّه
................
مبقاش فيه أزمات
والهمّ مرّ وفات
والذلّ عدى ومات
ولا حد شايل همّ
! ولا في الوجع بيبات
..............................
وولادنا متهنيّين .. وفي العسل نايمين
!ولا لهم الجواز شايلين
الشقه موجوده .. والحاله زي الفلّ
!ولو مش مصدقني .. تعالى عليها وطلّ
............................
تسلم يا ريّسنا
يا سندنا يا حارسنا
ياللّي بكل الخير دايما مكربّسنا
ويارب تبقى بخير .. وتجيلنا كده وتهلّ
زي الهلال طالل .. ومن طلعتك ما نمّل
....................
محلاك يا بلدنا وأنت بتحوي الخير
بتمنحيه لينا مع كل طلعة شمس .. ورفرفه للطير
محلاك كده وأنتي .. مرسى أمان للغير
!محلاك كده وأنت .. مرسى أمان للغير
............................
تحياتي للجميع ..في إنتظار تعليقات من نار .. على قصيدتي المتواضعه

8 comments:

Unknown said...

السلام عليكم

مبدأيا كدة الف مبروك ع المدونة ويارب تبقى فاتحة خير عليكى وتبقى من اشهر المدونات فى الفضاء البلوجرى ان شاء الله

قصيدتك حلوة اوى بجد .. بس تقريبا انتى غلطتى فى الإسم .. اصل دى مش مواصفات بلدنا دى البلد اللى جمبنا يابنتى
:D

يلا على رأيك ربنا يخليه اهوه بالخير كابسنا .. بس الله يكرمك ماتكبسهاش أكتر من كدة الشعب فطس خلاص ههههههههه

سلام ياجميلة ونورتينى فى المدونة بجد

Anonymous said...

أنا مش مصدقه عنيا والله أنت إنسانه بجد حسيتي بيا وكنتي أول تعليق هنا نورتي المدونه حقيقي وتسلمي يارب ..
هوه انا مغلطتش ولا حاجه أصل القصيده تريئه نقول ايه ..
بجد فرحانه بزيارتك أوي ..

...

سـردية said...

الأصدقاء الأعزاء
على وشك أن تكتمل أول خطوة في تجربة جديدة تحتاج للتواصل معها لكي تنجح
وهي محاولة البحث في منمنمات التراث المصري القديم وتقديمة بلا بسترة ولا اختزال وبلا تضخيم
فالوعي بهذا التراث والتعلم منه أحد الشروط الهامة لنهضة الأمة المصرية الذي ننشده

Mai Nagib said...

أشكر تشريفك للمدونه يا شريف بس مقلتش رأيك في القصيده .؟

Anonymous said...

سلام عليكم
جمييل يا مى وان شاء الله تبقى شاعرة جامدةةة مووووت
بس يا رب تخليكى كدة على طول فى همومنا ومشاكلنا واحوالنا عموما حلوها ومرها من غير تطرق للحب والغرام لاننا بجد زهئنا الشعراء والمطربين نازلين حب فى حب فى حب ماشي الحب جميل بسمتبقاش علاقة الولد بالبنت هى همنا الوحيد وشغلنا الشاغل ..وربنا معاكى ان شاء الله

Mai Nagib said...

ميرسي يا جيسي على تعليقك الرائع وعلى فكره أنا فعلا مبحبش الرومانسي على طول الخط ،صحيح بكتبه بس أغلبية شغلي بحب يكون فيه قضيه وده اللى بحاول أقدمه هنا وإن شاء الله ينال إعجابك وإعجاب الجميع ..
وهستنى ملاحظاتك وتعليقاتك ونقدك كمان ..

ghoneem said...

اهلااااا بيكي

قصيدة رائعة ومعانيها جميلة

لازم نحلم ببلدنا تبقي احلي الاوطان

وان شاء الله نشوفها كدة فعلااااا

تمنياتي بدوام الفوق

تحياتي.....

ehab2h2002 said...

انا موافقك فى كل حاجه قولتيها ماعدا حاجه واحده بتاعت الشقق موجوده دى فين؟......
بجد برافو عليكى يا مى جامده جدا
وبجد فيها نقد الواحد مش عارف يضحك ولا يبكى
اقولك الواحد يضحك على حالنا