Saturday, February 14, 2009

فرح متضفر بالغم - قصيده

فرح متضفر بالغم

إهداء
الى الشاعر الإنسان والأخ الأكبر والخلّ الوفي

مــُفتتح
الفرحه بتيجي ومتضفر فــ ديولها الغمّ
ده بصدره المفتوح برحابه
يجمع كل طاقات الفرحه
يلقى الهمّ
....
..
ليه بتريء؟
ع الناس المتشائمه
تمللّي
أول ما الأفراح تحضنهم
تلقى عيونهم
عمّاله يجرّفها الدمع
تلقى لسانهم
كاتم زغروطة أفراح
ويقولو
هتجرّ جراح
" خير اللهم اجعله خير "
...
عندكو حق !
أيامنا اتخلقت خـدّاعه
وعيلتنا صبحت بيّاعه
بدل أما تحاول تسندنا
يصبح خيرنا
فــ حجر الغيـر
تصبح ترتيلة أحزاننا
بيوزعها علينا الطير
تتـنّقل من حجر لحجر
صبحت بلورة أحلامنا
عتمه وبرد
وحياتنا محتاجه لفجر
شقشقة العصافير في جبينه
تحيي قلوبنا
وتغطي ببرائتها عيوبنا
تهديلنا ولو
"ريحة الورد"
....
مش هتريء أبداً تاني
صدقت ان الفرحه بتيجي
ومتضفر فــ ديولها الغمّ

الجمعه
13/2/2009
الخامسه مساءاً

2 comments:

إبـراهيم ... said...

مي ... هذه المرة جاءة الفرحة مضفرة بالإبداع

وأنا متفاجئ .. وسـعيـــد :)

مممممممممممممممممممم
فيه مشاكل في الكتابة زي (اتتريأ) أعتقد بتتكتب كده عامية

القصيدة حلوة قوي على فكرة

Mai Nagib said...

أنا كمان فرحانه جدا وجاءت الفرحه متضفره بالفرحه
هبقى أتأكد ان شاء الله من الكتابه
ربنا يكرمك هي حلوه وأنت أحلى
ميرسي على تلبية الدعوه يافندم